საქართველოს შესახებ

საქართველო მდებარეობს კავკასიაში, შავ და კასპიის ზღვებს, რუსეთს, თურქეთს, სომხეთსა და აზერბაიჯანს შორის. მისი ფართობი 70 ათას კვადრატულ კილომეტრს აღწევს. ქვეყნის ტერიტორიის ფორმირება 600 მილიონ წელს ითვლის.

საქართველო უძველესი ისტორიისა და კულტურის მქონე ქვეყანაა. ისტორიული ჩანაწერები საქართველოზე 4 ათას წელს ითვლის. ქვეყანას უნიკალური, ქართული დამწერლობა გააჩნია, რომელიც ჩვენი წელთაღრიცხვამდე მეხუთე საუკუნეში შემოიღეს; ქართული ენა დამოუკიდებელ ენობრივ ჯგუფსაც ქმნის. საქართველო არის ერთ-ერთი პირველი იმ ქვეყნებს შორის, სადაც ქრისტიანობა სახელმწიფო რელიგიად მეოთხე საუკუნის პირველ ნახევარში გამოაცხადეს.

საქართველოს ტერიტორიაზე ბუნების ასეულობით ისეთი ძეგლია, რომელიც განსაკუთრებულ შთაბეჭდილებას ახდენს. მათ შორისაა დინოზავრის ნაკვალები, უზარმაზარი და დიდი სიღრმის მქონე მღვიმეები, ღრმა და ენდემური სახეობებით გამორჩეული კანიონები, დიდი ენერგეტიკული პოტენციალის მქონე მდინარეები, გაუვალი ტყეები და სხვ. ბუნების სხვადასხვაგვარი ძეგლები მცირე ფართობზეა თავმოყრილი, რაც ზრდის ბუნების რეკრეაციულ დანიშნულებას. მათი მნიშვნელოვანი ნაწილი საქართველოს დაცულ ტერიტორიებზეა წარმოდგენილი.

---

მხარეები

---

აჭარა (ბათუმი)

გურია (ოზურგეთი)

იმერეთი (ქუთაისი)

კახეთი (თელავი)

ქვემო-ქართლი (რუსთავი)

სამეგრელო        —ზემო-სვანეთი (ზუგდიდი)

მცხეთა-მთიანეთი (მცხეთა)

რაჭა-ლეჩხუმი       —ქვემო-სვანეთი (ამბროლაური)

სამცხე-ჯავახეთი (ახალციხე)

შიდა ქართლი (გორი)

საქართველოს სახელმწიფო დროშა (14 იანვარი, 2004 წელი) — არის მართკუთხა თეთრი ფერის ქსოვილი, რომლის ცენტრალურ ნაწილში გამოსახულია დროშის ოთხივე გვერდთან დაკავშირებული სწორკუთხა წითელი ფერის დიდი ჯვარი; ჯვრის ვერტიკალურ-ჰორიზონტალური მკლავებით გამოყოფილ ოთხკუთხედებში გამოსახულია ოთხი იმავე ფერის, ბოლნურ-კაცხური ჯვარი.

საქართველოს სახელმწიფო გერბი (დიდი) (1 ოქტომბერი, 2004) — წარმოადგენს ჰერალდიკურ ფარს, რომლის მეწამულ ველზე გამოსახულია ოქროს ჯვრის ბუნიანი ვერცხლის შუბოსანი, ვერცხლის გველეშაპის განმგმირავი, ვერცხლის ცხენზე ამხედრებული, ოქროს შარავანდედიანი ვერცხლის მხედარი – წმინდა გიორგი. ფარი დაგვირგვინებულია ივერიული (ქართული) გვირგვინით. ფარისმტვირთველი ორი ოქროს ლომი ვაზის სტილიზებული ორნამენტის საფუძველზე დგას. საფუძველზე გადმოფენილია ვერცხლ-მეწამული სადევიზე ბაფთა (ავერსი – ვერცხლი, რევერსი – მეწამული). ბაფთის ვერცხლის ველზე სევადისფერი ქართული მხედრული ანბანით წარწერილია დევიზი: „ძალა ერთობაშია“. ბაფთაზე, სადევიზე წარწერის თავსა და ბოლოში, გამოსახულია მეწამული ჰერალდიკური ჯვრები.

საქართველოს სახელმწიფო გერბი (მცირე) (1 ოქტომბერი, 2004) — წარმოადგენს ჰერალდიკურ ფარს. ფარის მეწამულ ველზე გამოსახულია ოქროს ჯვრით დაბოლოებული ვერცხლის შუბით ვერცხლის გველეშაპის განმგმირავი ვერცხლის მხედარი – წმინდა გიორგი ოქროს შარავანდედით. ფარზე ივერიული (ქართული) გვირგვინია.

საქართველოს სახელმწიფო ჰიმნის (21 მაისი, 2004 წელი) მუსიკა შეიქმნა, ქართული კლასიკური მუსიკის ფუძემდებლის ზაქარია ფალიაშვილის ოპერების: „აბესალომ და ეთერის“ და „დაისის“ მიხედვით, კომპოზიტორ იოსებ კეჭაყმაძის მიერ. ტექსტში გამოყენებულია ნაწყვეტები ქართველი კლასიკოსების: აკაკი წერეთელის, გრიგოლ ორბელიანის და გალაკტიონ ტაბიძის შემოქმედებიდან.